Dalas Bajimus, Saipul Rahman Karas Manjinguki Bubuhan Warga Susungaian

Tanah Bumbu -

Sabagai urang nang batanggung jawab mangatuai Partai PDI Perjuangan di Kabupaten Tanah Bumbu, Saipul Rahman SR wani babasah kahujanan manjinguki bubuhan Pangurus Ranting wan Anak Ranting Partai.

Kada gagampangan, warga nang ditulaki ngini ada di 7 Desa, yaitu Desa Mekarjaya, Batarang, Salimuran, Pulau Tanjung, Karya Bakti, Satiung wan Sardangan nang ada di Kecamatan Kusan Hilir.

Nang lapahnya tu, jaka kawa didatangi pakai mutur nyaman. Ngini harus pakai parahu katinting, manyusur Sungai Kusan arah ka hulu ampah ka Kusan Hulu sana.

Nang ngaran sudah tatulak tulak tabuat kadalam katinting, biar hujan gin tatapai dikarasi Saipul Rahman manulaki bubuhan warga kampung di susungaian.

Warga nang didatangi liwar himungnya , waktu rumbungan Saipul Rahman datang, mudil kakanakan kulihan pamainanan kahimungan.

"Kami ngini pa ai, lawas dah mahadangi. Handak tahu habar napa nang pian bawa hati ini," ujar bubuhan warga.

Kada panjang carita, Saipul Rahman langsung mambuka kisah, bahwa inya datang ngini handak babagi SK wan Surat Tugas Pangurus Ranting wan Anak Ranting Partai PDI Perjuangan.

"Ulun datang kasini handak mambagiakan SK wan Surat Tugas bubuhan pian nang jadi Pangurus Ranting wan Anak Ranting Partai. Ulun singhaja kasini, maraganya waktu handak mambagiakan skaligus kada bulih adanya Covid 19, jadi biar am ulun nang mangalah mandatangi pian maunjuknya," ujar Saipul.

Ini mun SK wan Surat Tugas sudah pian ambil, ucap Saipul, bararti bubuhan pian sudah rasmi jadi bagian dari Partai, dan wajib mausahai Pasangan Syafruddin H Maming-Muhammad Alpiya Rahman (SHM-MAR) jadi Bupati wan Wakil Bupati Tanah Bumbu tahun ini.

"Partai kita adalah partai utama nang mandukung Pasangan SHM-MAR ngini, jadi wajib bagi kita kaya apa caranya mausahai supaya manang," sambat Saipul.

Napa da, warga nang sudah umpat bagabung ngitu baya mandangar harus manang, ba ampik sumangat bakuciak harus manang.

"Kami mandukung dan siap mamilih wan mamanangkan Pasangan SHM-MAR. Karna kami handak baubat kada babayar, anak kami kawa sakulah tinggi, jalan kami mulus nyaman dilalui, makanya kami mandukung Pasangan SHM-MAR ngini jadi Bupati wan Wakil Bupati Tanah Bumbu," ujar warga tumbur basumangat. (M12)