Kada lawas imbah tahabar ada nang babunuh diri bagantung, imbah tu ada pulang maumpati.
Mun dihitung hitung di Tahun 2023 ngini, kada kahitungan pang urang nang mati babunuh diri bagantung, kada lakian kada binian.
Nang kakaya ini am nang maulah Wakil Rakyat nang duduk di kursi DPRD Tanah Bumbu mawah mandangarnya.
Sayid Ismail Khollil Aleydrus, Wakil Ketua DPRD Tanah Bumbu, Mawah banar sidin mandangar. Uma...jar, kanapa nang kakaya ini ada tarus. Mamah banar kah iman atau buhan pamarintah kurang hantak kurang surung mamadahi masyarakat.
"Bunuh diri ngintu dosa ganal, kanapa dilakuakan. Bapikir masak masak, ingat anak kulawarga, ingat Tuhan, jangan asal bagantung," ujar sidin.
Padahal jar sidin lagi, unda ni sudah mamadahi jua, ayu buhan pamarintah kita sama sama mamadahi masyarakat, jangan babunuh diri. Kalu ada masalah, jangan handap pikir, bawa batanang, bawa sambahyang, minta pendapatnya lawan nang tatuha.
"Bulan dihadap, unda handak ma adakan partamuan, mangiyau buhan pamarintah mambahas masalah ngini, jangan sampai ada lagi nang mati babunuh diri," ujarnya liwat talipun.
Tidak ada komentar:
Posting Komentar
Silakan berkomentar tapi jangan bernuansa SARA.